Vari por le clima

Ai 12. de jügn 2023 él gnü a se l’dè na incuntada importanta, a chëla che al é gnü invié düc i scolars y les scolares dla scola elementara da Corvara y dla 1. classa dla scola mesana da La Ila. Sot al titul “Vari por le clima” an orü informé y sensibilisé i presënc sön l’importanza dla sconanza de nosta natüra ti comportamënc da vigni dé. L’incuntada á metü man dales 11.00 cun le salüt di ombolc di comuns interessá: Robert Rottonara por le Comun da Corvara y Iaco Frenademetz por chël da Badia. I assessurs Elide Mussner y Stefano Pezzei, á porté dant en ressumé di proiec de mobilité che i comuns se á tut dant. Dedô el gnü surandé deplö diploms y premié i partezipanc al concurs da pert dl Ökoinstitut Südtirol. Le proiet de sensibilisaziun “Vari por le clima”, a chël che i scolars á tut pert, á preodü la documentaziun dl tru por jí a scola por 23 dis. Cun cî meso é pa i scolars y les scolares rová adarlerch? Te na manira sostenibla, sciöche a pé, cun la roda o cun la coriera? O é i scolars y les scolares gnüs condüc fina dan porta cun l’auto? Por 23 dis alalungia á tambëgn i scolars, co ince i geniturs, messü tó la dezijiun da anuzé na alternativa al auto. Por se motivé l’un cun l’ater, é le proiet gnü realisé sot forma de concurs. “Vari por le clima” é mâ üna dles tröpes aziuns por la mobilité, che é gnüdes metüdes a jí tles scolines, tles scoles elementares y tla scola mesana en colaboraziun cun l’Ökoinstitut Südtirol y i comun da Corvara, Badia y La Val. 1483 scolari y scolares, despartis sö te 8 scoles, á tut pert ai proiec plö desvalis. Nanter ater él gnü metü a jí tles scolines en “training por jí cun la roda” cun Igor Tavella dles Rodes Val Badia, na sensibilisaziun ai prighi sön strada y l’aziun “pom o limon”, te chëla che i mituns á podü mosoré cun verda de comun la velozité di mesi. Le fí cöce che á colié dütes chëstes iniziatives é ste chël dla sensibilisaziun por na mobilité ativa y sostenibla che porta a na miú cualité de vita por düc.