Klima Gemeinde - Comune Clima

Vignun de nos adora vigni dé na gran cuantité de energia, a ciasa sciöche ince sön le laur, sön l’iade o tl tëmp lëde. L’energia che vëgn adorada, tl privat mo ince y dandadöt tl publich, pësa sambëgn sön l’ambiënt incër nos ia y ti vá tles gofes a vigni zitadin. Al é porchël gran ora da mudé nosc comportamënt, tres l’informaziun y la sensibilisaziun. Che al é cin’ menüc dan les dodesc se dij ince le fat che les parores “sostenibilité y sparagn” é deventades les parores plö adorades (mo ince plö strabaciades) di ultimi agn. L’aministraziun comunala da Corvara á scomencé da püch en tru che portes ince a soluziuns concretes, por che chëstes dües parores ne restes nia ma “parores”.  Al á porchël invié ia na incuntada cun l’Ökoinstitut dla Provinzia da Balsan, che daidará laoré fora i conzec nezesciars por arjunjer la zertificaziun de “Klima Gemeinde – Comune Clima”. Al se trata chiló de valutaziuns desvalies che vá dal sparagn energetich ala sconanza dl ambiënt y che reverda dütes les strotöres y infrastrotöres dl comun. Insciö por ejëmpel le consum de energia dl ciamp dala dlacia y dla strotöra dl Tennis, dl scialdamënt dla Ciasa de Comun, de Scora y de Scolina, dla Ciasa dles Uniuns a Calfosch y dl salf comunal a Corvara, mo ince dles condotöres dal’ega y dl’iluminaziun publica. Olá vara pa da sparagné? Olá el pa debojëgn da jí en tru alternatif? Le pröm vare che l’aministraziun se á tut dant é ste chël de mët sö en grup de laur che á sëgn l’inciaria da cöi adüm i dac che ti gnará dá inant al Ökoinstitut. Al sará spo avisa chësc institut che fajará les valutaziuns y dará inant i consëis y les mosöres da tó. L’Energy Team, insciö el gnü baité l’grup de laur, é metü adöm dal ombolt Robert Rottonara, Eduard Winkler, Stefan Costa, Silvia Kostner, Erich Pescollderungg, Harald Dapunt por i sistems eletrics, Christian Costabiei por les cuestiuns dl’ega y Claudia Pitscheider por ci co reverda la pert aministrativa y contabla.