Mudaziun dl clima: na scomenciadia dla Comunité Comprensoriala Val de Puster
Tres na inrescida sot a forma de domandes á la Comunité Comprensoriala Val de Puster orü aldí les minunghes di zitadins y ti dè la poscibilité da fá propostes concretes.
Da deplö pertes vëgnel laoré por mët en pé scomenciadies de sostenibilité y de sensibilisaziun ala mudaziun dl clima. Insciö á fat ince la Comunité Comprensoriala Val de Puster, che á metü a jí na inrescida importanta che dëides laoré sö en plann a bëgn dl clima. L’aziun â le fin de porvé da capí naota danfora les sensaziuns y les minunghes di zitadins tl raiun de Puster y de dè spo ince spunc de aziun tla vita da vigni dé. La inrescida, sot a forma de domandes, é stada da ciafé tambëgn por todësch co ince por talian. Le zitadin â la poscibilité da dè jö le formular online o ince ti ufizi de so comun. Le termin programé é ste ai 18. de setëmber. Les respostes é gnüdes coiüdes ite dal zënter de competënza por le clima dl ufize regional de management dla Val de Puster y spo surandades ai comuns y ala Comunité Comprensoriala Val de Puster. Tla inrescida ti él gnü damané al zitadin sce al se sënt personalmënter atoché dal problem dla mudaziun dl clima, cî che al arata che messess gní fat por se adaté ales conseguënzes dla mudaziun dl clima y cî che al pënsa de podëi instëss mudé. I resultac ne é nia ciamó dan man, mo ai sará dessigü dër interessanc.
