A scora cun sostenibilité

Avisa sciöche l’ann passè, él gnü metü a jí ince chëst ann le proiet „Vari por le clima“. Ai 10. de jügn  á dütes les classes dles scores elementares di comuns da Corvara y Badia, entrami „Comuns Clima“,  tut pert al proiet dl Ökoinstitut Südtirol. La premiaziun é gnüda a se l’dè tl  salf F.A. Rottonara. Le concurs „Vari por le clima“ fej pert de na ligna plö ampla de proiec de sensibilisaziun por promöie na mobilité plö sostenibla. Le travert dl proiet é chël de ti mostré ai mëindri che vignun de nos, ince te so pice, po fá val de bun por l’ambiënt: cun l’adoranza de mesi de trasport sostenibli vala da smöie la sozieté a ester manco dependënc dal auto privat. I mituns y les mitans che se á metü sön tru da jí a scora a pé o cun le bus publich á coiü adüm man man deplö punc vërc. Chi che é gnüs a scora cun l’auto, punc cöci. Insciö é i scolars, y cun ai ince les families, gnüs motivá a na mobilité plö ativa. Ala fin dl proiet é les classes che á coiü adüm deplö punc vërc gnüdes premiades por le bun comportamënt. Le dé dla premiaziun é gnü davert dai ombolc Robert Rottonara  y Iaco Frenademetz. Le vize ombolt dl comun da Corvara Stefano Pezzei y la referënta dl comun de Badia Edith Dapoz á presenté i proiec de sensibilisaziun y á rengrazié i partezipanc por avëi tut pert cun tan na gran motivaziun. A dütes les classes ti él gnü surandé en pic diplom adüm cun en bonn por en dlacin. En pest particolar ti é jü ales  classes che se á plazé ai prüms trëi posc: en curs da arpizé tla hala da Boulder da Corvara. Ince i pici dles scolines da Corvara y San Ciascian á tut pert al proiet, se dan jö cun agilité y segurëza tl  parcours de movimënt a tema. An spera sëgn che al restes zeruch de bogn insegnamënc y che la sumënza dla sostenibilité pois porté früt ince tl dagní, dal momënt che al é gnü desmostré tan en gran interess da pert de düc i partezipanc.