Presc a piz i laurs pro le tretuar de Pera Ciaslat

Cun l’aumënt di sciori y dles porsones che vá a pé mo ince cun l’numer de chi dales rodes che crësc da isté a isté, é le toch de stradun dal Salvan a Pera Ciaslat cun i agn deventada na trassa de prigo. Bele da di se ghirâ i zitadins na poscibilité de coliamënt. Sëgn éla prësc tan inant. I laurs por la realisaziun d’en tretuar  por jí y gní dai paîsc de Corvara y Calfosch va bel plan a piz. Ai á metü man da d’altonn dl ann passé y vá sëgn dötaurela inant. L’aministraziun comunala á preodü che ai gnará stlüc jö incër mez jügn. Le tretuar, che rovará fina sö dal parch dai tiers é lunch 640 metri y lerch 1,5 metri. Al gnará asfalté y ciafará sambëgn ince na iluminaziun. Tl respet dles normatives de segurëzza gnarâl ince fat en tlander de lëgn. Dlungia le raiun dl parch dai tiers el gnü fistidé por fa sö en mür de sostëgn de peres (Zyklopenmauer). Le tretuar se röia pormez al’entrada dl parch, dlungia la fermada dles corieres y la plaza da parché. Da d’altonn jaran inant cun i laurs por le colié cun chël che vëgn da Calfosch jö.