Nos por Os

Ince sce ala ne podess pordërt nia ester insciö, sozedel che i zitadins se sënt datrai dalunc dales istituziuns publiches. Porchël ó le Comun da Corvara fá en vare inant y porvé da ciafé fora tambëgn i punc stersc che caraterisëia l’aministraziun, co les mancianzes che arlungia tres deplö le destanziamënt dala jënt. En sostanza: al mancia la odüda dl laur dl comun sciöche sorvisc al zitadin! La scomenciadia é piada ia dal aconsiadú Franz Kostner che á odü ite le bojëgn de fá valch de concret. Al ti é insciö gnü dé tles mans al Istitut de Public Management da Balsan, istituí dal’Eurac, l’inciaria de analisé profescionalmënter la situaziun. Chësc istitut á i dër stromënc de relevaziun dles problematiches y á ince bele le confront cun d’atri comuns. Por podëi laoré fora soluziuns, val en iade debojëgn da mët fosch sön blanch la situaziun atuala. Chël ó dí che al gnará fat cun vigni colaboradú y aministradú dl comun na intervista de zirca 60 menüc, te chëla che al gnará metü jö les lamenteles, i aspec positifs, les impresciuns. Sambëgn gnarâle ince rajuné cun l’ombolt, i aconsiadus y i assessurs. Ai zitadins ti gnarâl mené en chestionar da scrí fora y da dé jö.  Tleramënter gnarâl fora en cheder dër desvalí, ciudí che vignun á n’atra vijiun dl comun, vignun á atri bojëgns, vignun atres ghiranzes. Ala fin dla recoiüda di dac, passará l’istitut designé al’analisa. L’resultat, acompagné da deplö propostes de soluziuns, ti gnará tla finada presenté al’aministraziun. Por Franz Kostner, mo ince por düt l’consëi che á dit de sce a chësc proiet, é chësc sënzater le dër trú da jí, na ocajiun por se mioré y por porté ite en cambiamënt.