Controi tles abitaziuns convenzionades

La gauja é danter l’ater che al ne vëgn nia dagnëra tigní ite les obliënzes preodüdes dal convenzionamënt.  I zitadins che pò ocupé n’abitaziun convenzionada mëss podëi mostré sö de avëi la residënza anagrafica tla Provinzia al momënt dl’emisciun dla conzesciun por le frabiché; i medemi, respetivamënter i componënc dla familia, ne po nia ester proprietars de na abitaziun adeguada al bojëgn dla familia te na localité da arjunjer saurí dal post de laur o de residënza (40 km), y ne po nianca avëi le dërt de usufrut o de abitaziun sön en te cuartier. A chîsc vëgn ecuiparades, por ci co reverdla la residënza, les porsones che al momënt dl’ocupaziun dl’abitaziun à la residënza o le post de laur te n comun dla Provinzia da almanco cin agn. I cuartiers convenzioná po ince gní ocupá da porsones cun en contrat de laur regolar tl teritore dla Provinzia, por la durada de chësc. L’abitaziun po ince gní ocupada dal proprietar istëss, tan inant che al á i recuisic. Chi che frabica abitaziuns convenzionades se sparagna cutes mo mëss tl medemo momënt ince tigní ite les obliënzes dl convenzionamënt (art 79 LP 13/1997, respetivamënter art. 40 dla LP nr 9/2018). Tl cajo de afit ti prüms 20 agn mëssel gní apliché le prisc scrit dant da la Provinzia. I zitadins che é proprietars de n’abitaziun convenzionada mëss podëi desmostré sö che l’abitaziun é gnüda dada ia a porsones che n’en á le dërt anter en ann dal documënt de abitabilité. Sce l’abitaziun se delibrëia, mëssel gní dé comunicaziun al comun y l’abitaziun gní indô ocupada anter 6 mëisc. Sce al ne vëgn nia fat la comunicaziun por tëmp, vëgnel scrit dant na straufunga de 500 eur. Sce l’abitaziun vëgn anuzada da porsones che n’en á nia le dërt, vëgnel calcolé cin iadi le fit scrit dant por döt le tëmp che l’abitaziun é gnüda anuzada iregolarmënter. La suravijiun dl respet dles normatives é de competënza de vigni comun. Aladô dla lege provinziala n. 13/1998, articul 62-ter, comma 5 po le comun sotscrí na convenziun cun l’agenzia provinziala de suravijiun y se anuzé dl sorvisc de control. Chësc é avisa cî che le Comun da Corvara á fat. An ó insciö se assiguré che al vëgnes bëgn ince tigní ite i impëgns suratuc dai proprietars de abitaziuns convenzionades. La seleziun di zitadins da controlé gnará fata tres na prozedöra trasparënta, stabilida tl regolamënt. L’aministraziun comunala á ince la poscibilité da se damané controi spezifics, che gnará denant valutá sce al n’en é o no la motivaziun. L’ufize  provinzial competënt pó ince intervení, sce al é gnü fat denunzies. Le zitadins á spo 30 dis de tëmp por fa osservaziuns derevers. Tla convenziun impormët le comun da trasmët al ufize competënt tres suport digital y cun coliamënt ala rëi, düc i dac y les informaziuns disponibles che reverda abitaziuns, posiziun tributara, situaziun anagrafica dl proprietar y de chi che abitëia al momënt l’cuartier, fornitöra di sorvisc comunai y atres informaziuns nezesciares. I dac y la documentaziun gnará tratá tl respet dl regolamënt UE 2016/679. Le comun, che gnará informé, é a conoscënza che tl cajo de iregolaritês, po l’ufize mët en funziun la sospensiun o la stlüta di sorvisc. L’ufize de competënza scri fora les straufunghes. Tla convenziun él gnü sotscrit da trames les pert la majera colaboraziun y la majera trasparënza.