Recoiüda dl refodam

Sciöche tröc raiuns olá che le turism é le pilaster dl’economia, á ince le Comun da Corvara de gran dificoltês por ci co reverda la problematica dl refodam y de so reziclaje. I posc de recoiüda tl zënter di paîsc é gonot suraciariá y ne é dessigü nia la plö bela odüda, tambëgn por le scior che vëgn chiló en vacanza co por le zitadin che paia sües cutes ince por l’bun funzionamënt dl sorvisc. Deplö iadi á l’aministraziun perié i utënc, dandadöt hotí, ostaries, üties y botëghes da ne suraciarié nia les ciampanes mo da se to dlaurela y da jí diretamëntere tla desciaria de Col Maladët. Baldi é chësc invit nia gnü ascuté. Al é spo gnü ponsé ala realisaziun de isoles ecologiches, mo ince chësc proiet é gnü arforé da en recurs. L’aministraziun comunala á porchël fat en vare important tolan na dezijiun che comportará forsc en pü de malcontëza tl scomanciamënt mo che se presënta sciöche üna dles mius soluziuns. Sciöche bele tres le foliet La Usc di Ladins, vëgnel porchël lascé al savëi ince tres chësc blog che dal 01. de jügn gnará la gran pert dles ciampanes dal papier, dal spidl y da bossli tutes demez dai posc de recoiüda. Ales sará da ciafé mâ plö te dui posc: tres la strada Rütort a Corvara, dlungia le cantier de comun y a Calfosch tla localité Sotdlijia. Al restará inant les baraches dal cartun, olá che an podará lascé jö ince i sac vërc cun le blasun de comun. Le refodam organich, che po atualmënter nia gní desciarié fora en Col Maladët, gnará coiü adöm inant dala firma inciariada. Ciarun de tigní adüm y da se tigní al regolamënt: al se trata d’en pic sforz che vëgn damané por avëi nosc paîsc plö bel y plö nët!