Home // Novités y articuli
04/16
02.03.2018: i destüdafüch da Balsan ciaria la vasca dal'ega de Calfosch La ro á rot i ros dles condotöres dal'ega

Tacades adöm les vasches dal'ega dl Salvan sura Rönn y de Pisciadú

Un di problems plö atuai é chël dl’ega. L’mudamënt dl tlima y i mëisc de süta che vëgn dant tres plö gonot se fej daurí i ödli sön la gran importanza de chësta resursa naturala, che parô sënza fin. Dandadöt t’en comun sciöche l’nost, che vir y basëia süa economia sön le turism, é l’ega ince da chësc punt d’odüda de importanza primara. L’aumënt dl numer di lec y dles strotöres dl turism, l’ampliamënt di hotí cun nodadoies y raiuns de wellness y bëgnsté á aumentè dassën l’consum dl’ega. Pormez vëgnel spo ince les problematiches dles condotöres che se sposta o se rump a gauja dl terac en movimënt. Tröc se recordará de chësc fat sozedü ai 02. de merz dl 2018: na rô á intort i ros dla condotöra dal’ega dla vasca dl Salvan sura Rönn. Por evité che le paîsc da Calfosch restess sënza ega amesa la sajun da d’invern, é intervenüda la “Berufsfeuerwehr” da Balsan che á condüt ega por en zacotan de dis alalungia da Corvara a Calfosch, implinin la vasca cun en auto da la bot de 30.000 litri, fina che la condüta é indô stada cunciada. Giulan ai destüdafüch  é la situaziun critica dô n’edema  gnüda desgropada.  Por chëstes gaujes y por garantí en anuzamënt de plëgn dl’ega ince it mëisc de saison, á l’aministraziun comunala sëgn fistidié por la realisaziun d’en coliamënt dla vasca de Pisciadú cun chëla dl Salvan sura Rönn. Avisa chëst’ultima é ince la vasca por le paîsc da Calfosch. Tres mesi d’escavaziun él gnü giavé sö l’canal, metü jö i ros y arjigné ite les pumpes che é punsades por laoré te trami dui i versc y po porchël pumpé ega da na vasca al’atra. La trassa dla condotöra é lungia 1.300 metri por en deslivel de 160 metri. Le coliamënt jará en funziun vigni iade che al n’en é debojëgn. Interessant él ince da savëi che l’implant dl Salvan é fat da dües vasches da 450.000 litri, por en total de 900.000 litri d‘ega. Dües vasches él ince tl implant de Pisciadú: trames dües de 350.000 litri, por en total de 700.000 litri d’ega. Al é preodü na capazité de pompaje da na vasca al’atra de zirca 20 litri al secund.

Coliament vasches Calfosch
Comune di Corvara in Badia
Via Col Alto 36
39033 Corvara in Badia (BZ) // Italia
Part. IVA: IT00482100211
T +39 0471 836184 // info@corvara.eu