L'altonn é chiló, l'invern tlocora tosc a porta

Cun i dis che se scürta y les nöts che vëgn plö frëides, vëgnel te nosc raiun taché dampró ia indô i implanc de scialdamënt. Por che l’energia sîdes bëgn ince anuzada te na manira efiziënta y che nosta sanité, nosc tacuin y sambëgn ince nosc ambiënt vëgnes sconá, vara indere da tigní cunt d’en valgügn aspec. La temperatöra di locali dess rodé nanter i 16 y i 20 degrá. Tratan la nöt y ti locai manco anuzá dess la temperatöra gní arbassada. Na picera desfarënzia fej sparagné tröpa energia: sce an arbassa la temperatöra de mâ 1 en degrá, spo se smendrësc l’consum dl 6 %! Por mantigní le cialt ne dess i radiators nia ester posizioná dô möbli o cultrines. Por en funzionamënt efiziënt di radiators, él important da lascé fora regolarmënter l’air dai ventils. Por mantigní le cialt t’en local dess les portes che codüj ti locai manco scialdá resté stlütes. Portes y finestres dess poscibilmënter ester isolades, avisa sciöche i ros dles condütes y l’implant d’acumulaziun. Le sistem de scialdamënt dess gní revijioné regolarmënter da chi dl mistier, ince por se assiguré che al ne vais nia pordü energia. Ince daurí les finestres da chi 5 a 10 menüc al dé, daida baraté fora l’air di locai y miorëia nosc bëgnsté. Te ciases nöies o che è stades isolades dessel gní instalé, tan inant che al è meso, en impant de areaziun che regolëia automaticamënter le barat dl’air. 

Scialdé a lëgna: en cialt pajor sënza messëi se sintí en colpa!

Frogorá y moguns ciafa te Südtirol tres ciamó en gran consens, mo borjé materiai nia adatá comporta sambëgn en majer incuinamënt dl air. Chësc po gní stravardé cun l’cerne en pü plö avisa cî sort de lëgna tizé: le miú é lignan sëch, nia traté, brikets o pelets che dess gní impiá sö cun bordiscores o impiadus ecologichs. Cun le borjé lignan traté o töme, paier o ciomënt, se formel tossri che se mantëgn te ciasa y danejëia nosta sanité y l’amb iënt. Ince le tizé instëss se damana val precauziun:  la bocia dl frogoré o dl fornel ne dess mai ester massa plëna y la lëgna dess ester borjada jö dl döt, denant co n’en mët dô. La bocura dal air dess gní daverta dan le tizé y indô stlüta de fin canche al ne è plö degun bordigun. Fondamental è ince le romené fora le cëinder, puzené le frogoré y fá gní regolarmënter le scoaciamin. En föm dër sterch, tof da borjé, cëinder plö posoch, en majer consum de lëgna y flames scüres cöcenes é le sëgn che le fornel mëss gní revisioné.