Novites importantes tla Comisciun Comunala por le teritore y le paesaje y tl regolament por le frabiché

Novitês importantes é gnüdes a se l’dé tratan l’ann 2021 por ci co reverda le frabiché. Ince l’Comun da Corvara, sciöche porater düc i comuns de Südtirol, á messü aproé la nöia comisciun por le teritore y le paesaje, en ciaria por la perioda che vá dal 2021 al 2025. Le nü regolamënt é basé sön le “Regolamento Edilizio Tipo”, aproé dala junta provinziala cun la delibera nr 31 dl 30.03.2021. Chësc documënt é gnü laoré fora adüm dal Consorz di Comuns, en colaboraziun cun i esperc di comuns y dla provinzia tres le sostëgn dl comité dles profesciuns tecniches. Ince sce al se trata d’en stromënt co vincolëia, é le regolamënt nü aproé dala provinzia, te tröpes perts “morjel”. Chël ó dí che al ti vëgn lascé la poscibilité ai comuns de laoré en pert ince en autonomia, tignan cunt dles desfarënzies de ubicaziun y de orientamënt.  Tl provedimënt instëss podunse lí fora normatives de carater facoltatif, alternatif y descrezional. Sot a normatives de carater facoltatif, él da intënn por ejëmpel la poscibilité de mët jö criters plö detaiá por cî co reverda les carateristiches de costruziun y l’estetica di raiuns tl ambit dl prozedimënt de valutaziun por l’autorisaziun al frabiché. Sot a normatives alternatives, él da intënn la dopla formulaziun dla medema norma cun la poscibilité de chirí fora da pert dl comun, la miú y la plö adatada ai bojëgns. Nanter chëstes normes tomel ite por ejëmpel chëla co reverda la sistemaziun dl terac y di implanc publics ala fin d’en laur. Te chësc cajo á le Comun da Corvara orü chirí fora la varianta alternativa, che vëiga danfora le dovëi dl proprietar de mët indô a post le terac provisoriamënter anuzé y de paié de süa gofa les spëises. Da l’atra pert, á le comun le compit de controlé che i laurs vëgnes fac y stlüc jö sciöche al alda. Sot a normatives descrezionales, él da intënn na valutaziun descrezionala dl comun. Al fej pert de chëstes normes, ince chëles che regolamentëia sîs y mürs de confin, sconananza dl vërt y di lëgns, curides de frabicac y incuinamënt lominus. Por ejëmpel á le Comun da Corvara tut la dezijiun che la regolamentaziun che reverda sîs y mürs de confin sîdes formulada te na manîra por evité che al vëgnes avërt sö na recinziun mâ por le sú dejider dl propietar de privacy.  Le regolamentaziuns nöies por le frabiché de nosc comun, o altamo les pertes a descreziun dl comun, é gnüdes metüdes a papier te na colaboraziun strënta cun le Comun de Badia. Conscidran le teritore de vijinanza cun la medema identité, é na normativa al plö che ala vá medema, de gran importanza. Ma te chësta manîra él meso da garantí na continuité dl ciaré fora di frabicac te düt le raiun. Dô les incuntades cun le Comun da Badia, él gnü metü a jí ince incuntades cun deplö mëmbri dl consëi de comun y architec da defora por ciaré de arjunjer l’plö che ala vá en compromis ideal nanter les esigënzes estetiches di paîsc y en desfiramënt asvelt dles prozedöres aministratives tl damané na conzesciun da frabiché. La comisciun comunala por le teritore y le paesaje laora bele dal’aisciöda dl 2021 y á tut ite de plëgn les competënzes dla vedla comisciun dl frabiché dl comun. Al fej pert dla nöia comisciun Dot.Arch. Bruno Rubner sciöche espert de cultura dl frabiché, Dot. Arch. Stefan Hitthaler sciöche espert de planificaziun urbanistica, Dot. Agron. Alessandro Melchiori sciöche espert de sciënzes agrares, Dot.Avv. Albert Palfrader sciöche espert de sciënzes soziales y economiches, Dot.Arch. Johanna Paula Niederkofler sciöche esperta te materies de paesaje y Dot. Forest. Winfried Pezzei sciöche espert de prighi naturai. Sciöche an vëiga, é la comisciun metüda adöm da sis esperc de teritore y paesaje, de urbanistica,de  natöra,de  cultura edilizia, de economia, de sciënzes agrares y forestales, tambëgn scöche de prighi naturai. La pert tecnica é scrita dant dala lege proviziala 9/2018. L’ombolt Robert Rottonara resta inant presidënt dla comisciun, tratan che l’inciaria de tigní le protocol dles sentades é tles mans lezitëntes y dessigü ince espertes de Anna Maria Costa. Al vëgn porater lascé al savëi  che al é gnü pormez ti ultimi mëisc en nü tecnic comunal, tl inom de Dot. Eduard Winkler, na porsona de gran esperiënza y desponibilité. Le Comun da Corvara se aoda dassën che les dezijiuns che é gnüdes tutes, vaîs a bëgn de nosc bel paîsc y che le stil architetonich dl dagní mantëgnes y injuntes les carateristiches particolares dl teritore che un incër nos ia.