Viabilité y mobilité

Ti ultimi dui agn se á l’assessorat ala viabilité dl Comun da Corvara dé jö dassën por porvé da desgropé les problematiches dl trafich y dla mobilité. Porchël an ince orü met en pe en grup de laur, metü adöm da assessurs y acunsiadus, che se dè jö cun les tematiches plö desvalies mo che dess ala fin porté al medemo travert. Ciamò tratan l’ann passé an orü ti dè la priorité al gran movimënt de mesi che é sö por i jüs, dandadöt ti mëisc dl isté. L’incuinamënt acustich, le busiamënt de auti, rodes y corieres á bele dadî despassé ia le limo dla sostenibilité. An á nanter ater incuntè l’commissar dl guern por se damané plö controi. Chësc é ince en gran pert garaté giulan al coordinamënt dla polizia locala y dles forzes dl ordin: da mez má de chëst ann inant á la polizia locala de nosc comun fat 76 presënzes sön strada, te chëles che al é gnü controlé 540 motors y 290 auti. Bëgn 240 é stá i verbai por irregolaritês y infraziuns dl codesc dla strada. En plö él ince gnü fat dër tröc controi da pert di Carabinieri da Corvara y dala polizia stradala. N’atra priorité che l’assessorat se á dè, é chëla de instalé autovelox permanënc, dandadöt ti toc adërta fora y sö por i jus de Frara y de Ciaulunch. La domanda, che é gnüda dada jö, é ciamó tl ciafé na resposta. En ater proiet dër important, che é gnü metü en pé por smëndrí le trafich y che á ciafé scomanciamënt bele en l’ann passé, é le Corvara-Calfosch Express. Cun chësc sorvisc an orü ti dé ai sciori y ala jënt dl post la poscibilité da se möi te nosc comun lascian l’auto chît. Tla sajun da d’isté dl 2021 él gnü fat en döt chëles 10.000 obliteraziuns. Chëst ann é le sorvisc gnü anuzé ciamó deplö. Pormez él gnü ince la daurida dl implant Borest, che rapresënta en coliamënt ideal nanter i paîsc da Corvara y Calfosch. An po dí che düt se möi tla dërta direziun: chëla de promöi i spostamënc cun mesi alternatifs, co nia cun l’auto. Nanter ater á le Comun da Corvara dé inant na inciaria por ajorné l’plan de mobilité y azessibilité. Chësc é sambëgn meso mâ sce an cöi adüm dac concrec. Ti dis nanter l’12. y l’13. de agost él insciö gnü fat deplö mosoraziuns sön les entrades de paîsc. Al é gnü analisé i dac che reverda i passaji pedonai, de chi dales rodes, di auti y di motors. Le travert é sambëgn indô chël de mioré  la mobilité, laoré fora dac concrec por rové an conzet realistich. N ater punt da alzé fora é le proiet de colaoraziun cun i comuns de Badia y La Val. Tl invern 2022 él gnü mené fora por les ciase en sondaje sura la mobilité (ciara link injunté). I resultac é sta valgamia interessanc: bëgn trëicherc de chi che á respognü, á dit de adoré l’auto privat vigni dé, tambëgn por jí sön le laur co por se möi tl tëmp lëde. L’60 % di automoblisc vá cun l’auto da susc, mo l’43 % foss a üna da le sostituí cun en bus o en ater meso alternatif, sce al foss na majera frecuënza orara di coliamënc. Por ci co reverda  i jus, foss l’66 % a üna cun na stlüta a orars. Dal sondaje él spo gnü fora tler trëi prioritês: le tru dla roda fora por la Val Badia, en Citybus che coliëies düc trëi i comuns y, sciöche bele dit, na majera frecuënza orara dles corieres. Sciöche cuarto y ultim punt, vëgnel lascé al savëi che l’comun da Corvara á sotscrit en plan de mobilité deboriada cun düc i comuns incër l’Sella. Chësc é le prüm iade che i responsabli di paîsc de trëi provinzies desfarëntes, se sënt jö pro na mësa y porta dant sües propostes por i jus incër l’Sella, cun na vijiun derevers al ann 2030. Sce tl 2020 él gnü registré sö por i jus en 80 % di passaji che reverdâ auti, insciö on porvé da druché jö chësta perzentuala al 36 %. L’trasport publich dess passé dal 3 % al 30 % por cî co reverda les corieres y dal 2 % al 16 % por cî co reverda i implanc. L’important é sëgn laoré deboriada, uní les forzes y se anuzé dles informaziuns coiüdes adüm da stüdi y sondaji por porvé da ciafé soluziuns realistiches, bun punsades y cun en conzet concret y che se lascia fá.