Francesco Longhi: campiun söl motor!

L’jonn da Corvara de 16 agn è ste le miú te süa categoria, dô bëgn 8 dis de gares, despartides sö te 4 tapes. Les competiziuns á ciafé lerch a Graffignano (VT), Olbia (SS), Aielli (AQ) e Ortovero (SV) y se á desfiré sön endöt bëgn 450 chilometri de seturs seletifs cronometrá. Francesco è tesseré pro l’Moto Club RMG de Ravenna, cun a cé Gabriella Bagnaresi, y è assistí dal team Beta Dirt Racing (FI) cun so presidënt Paolo Machetti. Denant co tó pert al campionat, á Francesco partezipé ala 15ejima Scuola Federale Motorally, metüda a jí a Riotorto(LI). Te chësta ocajiun ti él gnü insigné dai istruturs federai les tecniches da se möi cun le motor off-road (fora de stradun) y da ti jí pormez ai passaji plö ziti sön trusc y samenes strëntes. Nanter ater al imparé les noziuns de basa che an adora por la navigaziun y co adoré i stromënc nezesciars tratan les competiziuns. L’Motorally è na disziplina te chëla che al ne basta nia mâ savëi da jí dassën sön terac desvalies: al è debojëgn de na gran capazité de orientamënt por ciafé le dër tru, sënza jí ite te fai de navigaziun che pudess comporté pordüdes de tëmp y penalisaziuns. Francesco Longhi á fat la gara sön na Beta 50RR. L’proscim ann tolaral pert al campional talian tla categoria AX-125, tres cun en motor de marca Beta.

Che la devënta de Francesco ne é nia da püch, scrí ince Antonio Assirelli, coordinadú y responsabl dl Campionat Talian Motorally y dla Federaziun Motociclistica taliana, te na comunicaziun dl 24. de otober al Comun da Corvara. Nanter ater vëgnel chiló ince sotlinié che al é finalmënter garatada da mët sö na categoria por i motors de cilindrada 50, cî che é dër val de particolar: al vëgn por le plö garejé cun motors plö gragn, por ester bogn da afronté destanzes plö lunges y cun na majera potënza. Ai 16. de dezëmber gnaral a Corvara deboriada cun Gabriella Bagnaresi, presidënta dl Moto Club R. M.G. por ti surandé, adüm al ombolt Robert Rottonara, la medaia d’or (FMI-COMI) sciöche campiun talian 2022 – classe A-50.