Home // Novités y articuli
15/16
Laurs de ressanament pro le tru dl Gran Col

Laurs de ressanament pro le tru dl Gran Col

Incër i prüms de má an metü man cun deplö laurs pro le tru dl Gran Col che coliëia i paîsc da Calfosch y Corvara. La samena, che vëgn dassën anuzada dala jënt dl post mo ince dai foresti, rapresënta un di trus da spaziré plö importanc de nosc comun. Avisa porchël á l’assessur ai laurs Patrick Agreiter deboriada cun l’aministraziun comunala araté dërt da invié ia deplö mosöres de ressanamënt, ince ciudí che le tru ê en pert en malester. Le majer problem ê dessigü ti mëisc dl’invern y dl’aisciöda, canche cun le desparé di mesi de comun, rovâ ince peres y giarin ti prá dessot. Por sconé i terac di privac ne an nia orü slarié le tru, che é de 2,5 metri,  mo an á tut la dezijiun da le asfalté. Tla fasa de proietaziun, él gnü denant valuté sce curí jö cun en asfalt particolar. Mo a gauja di cosc plö alc y dla sort de material plö zite da mantigní tl tëmp, an impó ala fina orü to l’asfalt tradizional. Cî che á intardié i laurs de ressanamënt é stada la condotöra dal gas che ne ê nia ciamó danman y che an á aprofité da mët jö. Dl döt nü é l’implant de iluminaziun, cun löms a led. Giulan ala pendënza, jará da sëgn inant l’ega blancia coiüda sö te ros da mez le tru fina sön le lüch de Merscia. L’atra pert fina ia sön le lüch de Costa jará jö por pre. Plö bí y da ste saurí deventará i posc da palsé, olá che al é en pert ince gnü abelí y dé sostëgn al terac cun peres. I vedli banc gnará mudá fora cun i banc nüs dal relief de Sassungher cun lapró i cësc dal refodam. Por la realisaziun de chîsc laurs an sambëgn messü saré jö l’azess al publich, mo an podará indô anuzé le bel tru por le scomanciamënt dl mëis de jügn. 

Laurs de ressanament pro le tru dl Gran Col
Comune di Corvara in Badia
Via Col Alto 36
39033 Corvara in Badia (BZ) // Italia
Part. IVA: IT00482100211
T +39 0471 836184 // info@corvara.eu