Idees nöies por la recoiüda dl refodam

Al ne é nia novité che la recoiüda dl refodam rapresënta üna dles majeres desfides por vigni comun.  L’aministraziun comunala da Corvara se á de chësc vers confronté cun deplö aternatives por ciafé na soluziun al problem, problem che pësa dandadöt ti mëisc de sajun canche tigní nëc i punc de recoiüda devënta tres plö rî. Por capí plö avisa cî soluziuns che foss les plö adatades y cî investimënc che al foss da fá, ti él gnü dè bele dl 2016 l’inciaria de fá na analisa atuala ala dita Stadtwerke Brixen AG, dita co che se crüzia di sorvisc ambientai dl Comun da Porsenú. Aladô dla documentaziun che è gnüda laorada fora, él tler che la dërta direziun da jí è chëla de smëndrí i punc de recoiüda plö pici por realisé püces ijoles ecologiches cun soluziuns de recoiüda plö atuales. Nanter chëstes fossel da üna na pert les ciampanes te tera, por la recoiüda de spidl, bossli, papier y refodam bio, che ess ince na majera capazité, y dal’atra pert injinns idraulics por fracé adüm le refodam de rest. Cun l’ann 2017 él spo gnü laoré fora i prüms proiec por realisé dües ijoles, üna a Corvara y üna a Calfosch. Mo bele tla pröma fasa de realisaziun a Corvara, é le comun gnü archité sö por problems de destanziamënt dl’infrastrotöra ala spersa de terac dlungia. Baldi él da dí che, instëss, ne á le comun degun terac de proprieté da podëi anuzé por chësta gauja, avisa porchël él gnü damané na colaboraziun ales Fraziuns da Corvara, Pescosta y Calfosch. Porimpó ne él nia ste saurí da ciafé le dër post che conziliess les ghiranzes dles fraziuns y dl comun. Atualmënter á l’aministraziun laoré fora dui proiec de ijoles ecologiches, üna por Corvara y üna por Calfosch. Por l’2022 él preodü de mët a bilanz i mesi finanziars por la realisaziun. L’aministraziun comunala é dla minunga che cun chëstes nöies infrastrotöres, cun en majer anuzamënt dl zënter de recoiüda Col Maladët dandadöt da pert dles gran utënzes y sambëgn cun l’aiüt concret de düc i zitadins, funzionará le sistem cotan miú co sëgn.